Header Ads

Dkt Mwanjelwa awataka watumishi kuwa mfano wa kuigwa


Naibu Waziri, Ofisi ya Rais, Menejimenti ya Utumishi wa Umma na Utawala Bora, Dkt. Mary Mwanjelwa amewataka watumishi wa ofisi yake kuwa mfano wa kuigwa na taasisi nyingine kiutendaji kwa kufanya kazi kwa bidii, maarifa, uadilifu na weledi ili kujenga misingi bora ya utumishi wa umma nchini.

Dkt. Mwanjelwa ametoa maelekezo hayo jana wakati akizungumza na menejimenti ya ofisi yake, lengo likiwa ni kufahamiana na kupanga mkakati madhubuti wa utendaji kazi utakaoziwezesha taasisi za umma nchini kutoa huduma bora kwa umma.

Dkt. Mwanjelwa amesema, watumishi wa Ofisi ya Rais, Menejimenti ya Utumishi wa Umma na Utawala Bora, wamepewa dhamana ya kuhakikisha utumishi wa umma unakuwa na tija na maslahi kwa maendeleo ya taifa hivyo hawana budi kutekeleza wajibu wao kikamilifu.

Dkt. Mwanjelwa ameongeza kuwa, watumishi wakifanya kazi kwa kuzingatia sheria, kanuni, taratibu na miongozo ya utumishi wa umma iliyopo, malalamiko yasiyo ya lazima kwenye eneo la utumishi na utawala bora yatapungua kwa kiwango kikubwa.

Aidha, Dkt. Mwanjelwa amesisitiza kuwa, mtumishi wa umma anatakiwa kupimwa kwa utendaji kazi wake kwa matokea chanya ili atakapopanda daraja ajivunie utendaji kazi wake na kuongeza kuwa, upimaji huo utapunguza malalamiko ya kutopandishwa madaraja kwa watumishi ambao hawawajibiki ipasavyo.

Dkt. Mwanjelwa amekutana na menejimenti ya ofisi yake kwa mara ya kwanza mara baada ya kuripoti na kuanza kazi rasmi tarehe 14 Novemba, 2018.

Rais wa Jamhuri ya Muungano wa Tanzania, Mhe.  Dkt. John Pombe Magufuli alimteua Mhe. Dkt. Mary Machuche Mwanjelwa kuwa Naibu Waziri, Ofisi ya Rais, Menejimenti ya Utumishi wa Umma na Utawala Bora, tarehe 10 Novemba, 2018 na kumuapisha tarehe 12 Novemba, 2018

Get it on Google Play

No comments:

Powered by Blogger.